(¯`·.¸(¯`·.¸ Qur'an Kerim - Uyghurche Terjimisi (ULY) - Qaynam¸.·´¯)¸.·´¯): 62-Süre Jumu’e

Qur'an Kerim

Uyghurche Terjimisi

62-Süre Jumu’e

Medinide nazil bolghan, 11 ayet.

Nahayiti shepqetlik we méhriban Allah ning ismi bilen bashlaymen

Allah qa asmanlardiki we zémindiki nersiler tesbih éytidu. Allah padishahi (mutleqtur), (hemme nuqsanlardin) paktur, ghalibtur, hékmet bilen ish qilghuchidur [1]. Allah ümmilerge (yeni yézishni we oqushni uqmaydighan ereblerge) ularning ichidin bir peyghemberni (yeni Muhemmed eleyhissalamni) ewetti, u (yeni peyghember) ulargha qur'an ayetlirini oqup béridu, ularni (gunahlardin) pak qilidu, ulargha kitabni (yeni qur'anni) we hékmetni (yeni yeni peyghemberning sünnitini) ögitidu, gerche ular ilgiri ochuq gumrahliqta bolsimu [2] hemde (peyghemberni) téxi ularning zamanida bolmighan (kéyin kélidighan) ikkinchi bir qewmge (yeni qiyametkiche kélidighan musulmanlargha) ewetti (yeni peyghember eleyhissalamning peyghemberliki zamandashlirighila emes, belki qiyametkiche kélidighan kishilergimu omumiydur), Allah ghalibtur, hékmet bilen ish qilghuchidur [3]. Mana bu Allah ning pezlidurki, uni xalighan Ademge béridu, Allah ulugh pezl igisidur [4]. Tewratni kötürüshke (yeni emel qilishqa) teklip qilin'ghan, andin uni kötürmigenler (yeni tewrat bérilgen we uninggha emel qilishqa teklip bolsimu, uninggha emel qilmighan we hidayettin paydilanmighan Yehudiylar) xuddi kitab yüklen'gen éshekke oxshaydu (yeni paydiliq chong-chong kitablarni üstige artiwalghan, charchashtin bashqa, ulardin héchqandaq paydilinalmaydighan éshekke oxshaydu), Allah ning ayetlirini inkar qilghan qewmning misali némidégen yaman! Allah zalim qewmni hidayet qilmaydu [5]. (i Muhemmed!) éytqinki, "i Yehudiylar! Eger siler bashqilarni emes, peqet özünglarnila Allah ning dostliri dep dewa qilidighan bolsanglar, (axiretning rahitige tézrek yétish üchün) ölümni arzu qilip béqinglar, eger (bu dewayinglarda) rastchil bolsanglar" [6]. Ular qilghan gunahliri tüpeylidin, ölümni hergiz arzu qilmaydu, Allah zalimlarni bilgüchidur [7]. (i Muhemmed!) "siler qachidighan ölüm choqum silerge yoluqidu, andin siler gheybni we ashkarini bilgüchi (Allah) ning dergahigha qayturisiler, Allah silerge qilmishinglarni éytip béridu" dégin [8]. I möminler jüme küni jüme namizigha ezan éytilsa, Allah ni yad étishke (yeni jüme xutbisini anglashqa we jüme namizini ada qilishqa) aldirap béringlar, élim-sétimni qoyup turunglar, eger bilsenglar bu siler üchün yaxshidur [9]. Namaz oqulup bolghanda (yeni namazdin farigh bolghininglardin kéyin) zémin'gha tarilip (yeni öz meshghulatinglar bilen bolup), Allah ning pezlidin telep qilinglar, meqsitinglargha érishish üchün Allah ni köp yad étinglar [10]. (i Muhemmed!) ular birer tijaretni yaki tamashani körse, séni öre turup (xutbe oquwatqan) péting tashlap, uninggha (yeni tijaretke) yügüridu, (i Muhemmed! Ulargha) éytqinki, Allah ning dergahidiki nerse (yeni sawab we német) tamashadin we tijarettin yaxshidur, Allah riziq bergüchilerning eng yaxshisidur [11].