60-Süre Mumtehine

Qur'an Kerim

Uyghurche Terjimisi

60-Süre Mumtehine

Medinide nazil bolghan, 13 ayet.

Nahayiti shepqetlik we méhriban Allah ning ismi bilen bashlaymen

I möminler, méning düshminimni we silerning düshmininglarni dost tutmanglar, ular silerge kelgen heqiqetni (yeni islamni, qur'anni) inkar qilghan tursa, ulargha dostluq yetküzisiler, ular perwerdigaringlar Allah qa iman éytqininglar üchün peyghemberni we silerni yurtunglardin heydep chiqardi, eger siler méning yolumda jihad qilip we raziliqimni tilep chiqqan bolsanglar (u chaghda méning düshminimni we silerning düshmininglarni dost tutmanglar), siler ulargha yoshurun dostluq yetküzisiler, men siler yoshurghan we ashkarilighan nersilerni bilip turimen, kimki shundaq qilidiken (yeni ularni dost tutup, ulargha peyghemberning xewerlirini yetküzidiken), u heqiqeten toghra yoldin azghan bolidu [1]. Eger ular silerni yengse silerge düshmen bolidu, silerge ziyankeshlik qilidu, silerni tillaydu, silerning murted bolushunglarni arzu qilidu [2]. Qiyamet küni silerning tughqanliringlar we ewladliringlar silerge héch payda yetküzelmeydu, Allah aranglarni ayriwétidu (yeni siler jennette bolsanglar, ular kuffarlarning qatarida dozaxta bolidu), Allah silerning qiliwatqan ishinglarni körüp turghuchidur [3]. Ibrahim we uning bille bolghan (möminler) silerge heqiqeten obdan nemunidur, öz waqtida ular qewmige: "heqiqeten biz silerdin we siler Allah ni qoyup ibadet qiliwatqan butliringlardin ada-judamiz, bizning arimizdiki adawet we öchmenlik taki siler yalghuz bir Allah qa iman éytqininglargha qeder ebediy saqlinip qalidu" dédi. Peqet Ibrahimning atisigha éytqan "elwette sanga meghpiret tileymen, Allah ning azabidin héch nersini sendin dep'i qilalmaymen" dégen sözini silerning nemune qilishinglargha bolmaydu. (Ibrahim we uning bilen bille bolghan möminler éytti) "perwerdigarimiz sanga tewekkül qilduq, sanga qayttuq, axir qaytidighan jay séning dergahingdur [4]. Perwerdigarimiz! Kapirlarni bizge ziyankeshlik qilish imkaniyitige ige qilmighin (ular bizge musellet bolup, bizni kötürgili bolmaydighan azab bilen dinimizdin chiqarmisun), perwerdigarimiz, bizge meghpiret qilghin, sen heqiqeten ghalibsen, hékmet bilen ish qilghuchisen" [5]. (i Muhemmedning ümmiti!) Ibrahim we uninggha egeshken möminler silerge, Allah ni we axiret künini ümid qilidighanlargha yaxshi nemunidur, kimki (imanidin) yüz örüydiken, (bilsunki) Allah (uningdin we undaqlardin) bihajettur, (Allah) medhiyige layiqtur [6]. Belkim Allah siler bilen siler öch körüdighan Ademler arisida dostluq peyda qilidu, Allah her nersige qadirdur, Allah nahayiti meghpiret qilghuchidur, nahayiti méhribandur [7]. (kuffarlardin) siler bilen urush qilmighan we silerni yurtunglardin heydep chiqarmighanlargha kelsek, Allah ulargha yaxshiliq qilishinglardin, ulargha adil bolushunglardin silerni tosmaydu, shübhisizki, Allah adillarni dost tutidu [8]. Allah din üchün siler bilen urushqan, silerni yurtunglardin heydep chiqarghan we silerni heydep chiqirishqa yardemleshkenlerni dost tutushunglardin silerni tosidu, kimki ularni dost tutidiken, ular zalimlardur [9]. I möminler! Silerge mömin ayallar hijret qilip kelse, ularni sinap körünglar, ularning imanini Allah obdan bilidu, eger ularni (sinighandin kéyin heqiqiy) mömine dep tonusanglar, ularni kapirlargha qayturup bermenglar, ular kapirlargha halal emes, kapirlarmu ulargha halal emes, kapir erlirining ulargha bergen mehrini qayturup béringlar, ularning mehrilirini bérip nikahinglargha alsanglar silerge héch gunah bolmaydu, kapir ayallarni emringlarda saqlimanglar, ulargha bergen mehringlarni telep qilinglar, kapirlarmu (hijret qilip kelgen mömin ayallirigha bergen) mehrilirini telep qilsun, Allah ning hökmi ene shu. Allah aranglarda höküm chiqiridu, Allah hemmini bilgüchidur, hékmet bilen ish qilghuchidur [10]. Eger silerning bezi ayalliringlar kapirlargha kirip ketse, (kapirlar bilen) urushup ghenimet alghan waqtinglarda, ayalliri kapirlargha kirip ketken kishilerge (ghenimettin) ularning bergen mehrining miqdarini béringlar (yeni musulmanlardin birining ayali kuffarlar terepke qéchip ketse, siler kuffarlar bilen urushup alghan ghenimet maldin mezkur ayalning érige mehri miqdari mal béringlar), siler özünglar ishen'gen Allah tin qorqunglar [11]. I peyghember! Mömin ayallar sanga kélip, Allah qa héch nersini shérik keltürmeslikke, oghriliq qilmasliqqa, zina qilmasliqqa, balilirini (jahiliyet dewridikidek qiz balilirini nomustin yaki kembeghelliktin qorqup) öltürmeslikke, bashqilarning balisini yalghandin erlirining balisi qiliwalmasliqqa, sen buyrughan yaxshi ishlardin bash tartmasliqqa bey'et qilsa (yuqiriqi shertler asasida) ulargha bey'et qilghin, ular üchün Allah tin meghpiret tiligin, Allah heqiqeten nahayiti meghpiret qilghuchidur, nahayiti méhribandur [12]. I möminler! Allah ghezep qilghan qewmni dost tutmanglar, ular axiretning (sawabidin) qebriliride yatqan kuffarlar ümidini üzgendek heqiqeten ümidini üzdi [13].





Munderijige Qaytimen

61-Süre Sep

62-Süre Jumu’e

63-Süre Munafiqun

64-Süre Teghabun

65-Süre Telaq

66-Süre Tehrim

67-Süre Mulk

68-Süre Qelem

69-Süre Haqqe

70-Süre Maarij

71-Süre Nuh

72-Süre Jin

73-Süre Muzzemmil

74-Süre Muddessir

75-Süre Qiyamet

76-Süre Insan

77-Süre Murselat78-Süre Nebe

79-Süre Naziat

80-Süre Ebese

81-Süre Tekwir

82-Süre Infitar

83-Süre Muteffifin

84-Süre Inshiqaq

85-Süre Buruj

86-Süre Tariq

87-Süre Ela

88-Süre Ghashiye

89-Süre Fejr

90-Süre Beled

91-Süre Shemis

92-Süre Leyl

93-Süre Zuha

94-Süre Inshirah

95-Süre Tin

96-Süre Eleq

97-Süre Qedr

98-Süre Beyyine

99-Süre Zelzele

100-Süre Adiyat

101-Süre Qarie

102-Süre Tekasur

103-Süre Esir

104-Süre Humeze

105-Süre Fil

106-Süre Qureyish

107-Süre Ma'un

108-Süre Kewser

109-Süre Kafirun

110-Süre Nesr

111-Süre Mesed

112-Süre Ixlas

113-Süre Feleq

114-Süre Nas

Qur'an Kerim - Uyghurche Terjimisi : Munderije